Sunday, April 04, 2010

احترس من النووي

احنا بنعيش تقريبا في احلك الفترات التاريخية والسياسية والاجتماعية والاقتصادية في مصر حوالينا مشاكل كتير مش عارفين نحلها
مستوى التعليم زفت ما قبل الجامعى والجامعى
البحث العلمى في التراوة
العبقريات المصرية الكتيرة اغلبها بيهرب على بره بدل ما يتخنق في الروتين والمحسوبية
واللي بيفضل جوه مصر بيتوه في الزحمة
مستوى أجور متدني جدا
الرشوة في كل حته والكوسة لو عملنالها نهر النيل بحالة خلطة مش هيكفيها
نظام الحكم السوس بينخر فيه من زمان وجو سياسي يخنق
ادارة الازمات اختراع لم يدخل مصر الى الان
وحاجة تكسف التعامل مع اي حريق او انهيار عقار او حادث زي غرق العبارة او حريق القطر او تصادم او او... مش عايز اعدد انجازات حكومتنا الرشيدة كفاية اللى هى فيه
يا ترى ينفع مع كل ده بدء برنامج نووى مصري محترم... او غير محترم حتى
عارفين يعنى ايه نووى؟؟؟ يعنى الغلطة بجون
زي القنبلة اول غلطة هى اخر غلطة.. ولكن نتيجة الغلطة بتفرق
حتى لو قنبلة اكيد ضحاياها مش هيقارن بضحايا اي انفجار نووى
لو فاكرين حادثة انفجار مفاعل من مفاعلات محطة تشيرنوبل عارفين كان ايه سببه
خطأ تقنى بسيط جدا نتيجته مجرد التاخر في اتخاذ قرار تقنى
تصور في مصر منشاة نووية مصرية تعمل تحت الاعراف والقواعد المصرية
يعنى التعيين حسب الرشوة والمحسوبية وصلة القرابة
الامن الصناعى بيطبق على الورق بس زي اي حاجة على الورق بس في بلدنا
محدش ييجي يقولى بس في المفاعل النووى تفرق... مفيش حاجة تفرق في مصر
مهو في مترو الانفاق تفرق... ومع ذلك بتحصل حوادث واعطال وخدمة سيئة من ساعه ما الشركة الاجنبية سابت ادارته للادارة المصرية المتميزة
مهو مجلس الشعب يفرق... ومع ذلك اتحرق وراحت معاه وثائق ومعلومات مهمة جدا
مهو التعليم يفرق... وطبعا انتو عارفين يعنى ايه تعليم في مصر.. يعنى وكسة.. ومع ذلك مرتب بعض الباحثين والعلماء النوويين في مصر اقل من مرتب المدرسين
انا خايف... خايف من حاجة اسمها مفاعل نووى في مصر.. مع كل اللى بشوفه في الشارع المصري والمصالح الحكومية المصرية.. والمدارس المصرية.. والمستشفيات المصرية.. ونفسية المصريين وطباعهم.. وعاداتهم وتقاليدهم.. خايف من مفاعل نووى في مصر.. يبقي زريبة من الزرايب اللى بنشوفها دايما.. مش في الشكل انما المضمون
حد يقولى طيب ولو تم المشروع تحت اشراف اجنبي وادارة اجنبية.. اعتقد يبقي قلته احسن.. لأن حتى لو حصل هيبقي لفترة وبعدين يبقي تحت الادارة المصرية
اتمنى ان كل اللى قولته ده يبقي غلط.. واتمنى اسمع رأيكم.. هو انا ليا حق اخاف ولا لا؟؟

Sunday, March 28, 2010

اهو جه يا ولاد اهو جه يا ولااااااااااااد



تهنئ المدونة الشعب المصري
بسلامة وصول السيد الرئيس/ محمد حسنى مبارك
وتقدم لسيادته خالص الامنيات بدوام الصحة والعافية
جعله الله زخرا وفخرا لكل المصريين
فهو الرئيس الاب والقائد والمعلم
وظل الله على الارض والمنزة عن اى عوج او نقص
هو راعى الثقافة والمثقفين
راعى الرياضة والرياضيين
راعى العلوم والمعلمين
راعى الشباب ووالمشبشبين
راعى الفن والفنانين
راعى السياسة والسياسيين
راعى الاسماك والسماكين
حامى حمى الديار المصرية
الشرقية منها والغربية


كمان تقدم المدونة تهنئة خاصة
للسيدة حرم فخامة السيد الرئيس
الوالدة باشا هانم
ام ولى العهد المصون
ذات الاصل الانجليزي العريق
وراعية المرأة والتحرر
كمان اشكر الفنان القدير عمر و دياب
على اغنيتة الرائعة واحد مننا
فعلا هذه الاغنية تعبر عن مكنونات الشعب المصري العريق
فكثيرا ما شاهدت السيد الرئيس
وهو واقف بجابني في طابور العيش
وفي طابور السجل المدنى
وفي طابور المستشفى العام التى تعالج فيها
مثله مثل اي فرد من الشعب
فنحن لا نصدق الاشاعات المغرضة
التى تزعم ان الرئيس تعالج في الخارج
هذا كلام المغرضين والحاقدين
الرئيس لا يتأفف من العلاج
مثل اي واحد من رعيتة
حفظة الله ورعاه
وحماه من كيد المعارضة والبرادعى وما سواه

Tuesday, March 23, 2010

اجهاض اه.. اصلاح لا


لو طالب مصري صميم من طلابنا المتفوقين اللي مش بيعرفوا الالف من كوز الدرة انتاج وزارتنا المجيدة وزارة الأغبية والتعقيد اتزنق في امتحان ايه اللي بيحصل؟؟!!
اكيد بما ان الطفل المصري هو اذكى طفل في العالم (لغاية ما يدخل المدرسة بس وبعد كده يبدأ مستوى الذكاء في الهبوط) اكيد هيتصرف ولنتخيل مثلا على سيبل المثال اجاباته على الاسئلة المزنوق فيها.. عافاكم الله

س: ماذا تعرف عن أشهر القادة العسكريين في الحرب العالمية الأولى؟
ج: كلهم ماتوا الله يرحمهم

س: ماذا فعل الرومانيون بعد عبورهم البحر المتوسط؟
ج - نشفوا هدومهم

س: اذكر ثلاثة أنواع من السمك؟
ج: سمك مقلي، سمك مشوي، سمك مملح

الظاهر والله اعلم أن وزرائنا العباقرة قرروا ان يقلدوا طلابنا المزنوقين وأن يتحفونا بحلول عبقرية للمشكلة السكانية المزمنة
وبما انهم مش عارفين الحل الصحيح شغلوا الفهامة العبقرية وتوصلوا الى حل عبقري للمشكلة السكانية بطريقتهم الخاصة
في رأيكم ما هو الحل للمشكلة السكانية في مصر؟
انا في رأيي اعتقد أن أفضل حل أن يتم تحويل عدد السكان الزيادة من مشكلة إلى ميزة باستغلالهم في مشاريع جديدة عملاقة وغزو الصحراء وخلخلة سكان الوادى وكل الحلول السحرية التى اتحفنا بها علماء افاضل والتي تصر الحكومة على عدم تطبيقها خوفا من انهم يتقال عليهم انهم بيسمعوا كلام حد من ولاد ال........ اللي بيفهموا لا سمح الله
أو الحل الآخر وهو تقليل عدد السكان الفقراء برفع مستوى معيشتهم وبالتالي زيادة الطبقة المتوسطة صمام امن المجتمع وتقليل الطبقة الفقيرة القنبلة الموقوتة في المجتمع
نرجع لموضوعنا وهو الحل السحري التى اتحفتنا به الحكومة واصبح بالفعل مشروع قانون في مجلس الشعب
الحل هو اباحة الاجهاض والتعقيم ورفع الدعم عن المولود الثالث... يا حلولي يا حلولي.. ده على اساس ان فيه دعم حقيقي للمواليد الموجوده دلوقت


بيقولك بقي يا سيدي ان الست من دول لما تيجي تغلط غلطة كبيرة واستغفر الله العظيم يعنى متسمعش كلام الحكومة وتبقي حامل (من جوزها والله) وعلشان عدد الاسرة الصغيرة السعيدة ميكبرش يباح لها الاجهاض...و علشان متغلطش الغلطة الشنيعة دي تانى يسمح لها انها تعقم نفسها علشان متخلفش تانى خالص مالص
ده على كده بقي هتبقي هيصة طالما فيه تقنين لعملية الاجهاض هتلاقي كل البنات الغلبانات المضحوك عليهن من الذئاب البشرية الحل الأمثل واهو قانون الاجهاض موجود والضحك على القانون برده موجود اذا كان قانون اجهاض الزوجة الحامل بقي مقنن ليه هما مش يستفيدوا بيه هو كمان او حتى بطلعوا قانون اجهاض مخصوص ليهم ودى الخطوة الجاية اللي انا متوقعها
هى حكومتنا العلمانية المباركة مش واخدة بالها انها بتحكم شعب اغلبيتة مسلمة ولازم اي قانون لا يتعارض مع الشريعة الاسلامية
هي حكومتنا الغراء مفيش حد منها خالص قرا الآيه الكريمة اللي بتقول:
(وَلا تَقْتُلُوا أَوْلادَكُمْ مِنْ إِمْلاقٍ نَحْنُ نَرْزُقُكُمْ وَإِيَّاهُمْ ) الأنعام/151
والآيه الكريمة:
( وَلا تَقْتُلُوا أَوْلادَكُمْ خَشْيَةَ إِمْلاقٍ نَحْنُ نَرْزُقُهُمْ وَإِيَّاكُمْ إِنَّ قَتْلَهُمْ كَانَ خِطْئاً كَبِيراً ) الإسراء/31
طيب ولنفرض ان حكومتنا مفيهاش حد بيقرا قرآن خالص ولا تفرق معاه الشريعة الاسلامية في شيء.. مفيش حاجة اسمها دراسة اجتماعية ونفسية وقانونية ودستورية لأي قانون قبل ما يناقش في مجلس الشعب ولا اي واحد عنده فكرة يجري يروح بيها على المجلس كأنه جاب التايهة
هما اخواننا ناسيين ان عدد سكان مصر يعتبر من عوامل الأمن القومى المصري ولا هما لما لاقوا ان حملات تنظيم الاسرة (الممولة من امريكا والاتحاد الاوروبي اللي نفسهم نبقي زيهم وعدد سكاننا يقل ويبقي فيه خلل في التركيبة الاجتماعية علشان خاطر سواد عيون جارتنا اللدود اسرائيل) قالوا مش جايبة همها فنجيب من الأخر بقي وخلاص
اخاف ان يتحول الاجهاض في مصر الى ثقافة عادية ومنتشرة زيها زي اى دولة في اوروبا.. طيب مش قبل ما يقلدوا القوانين يشوفوا الاثار والنتائج المهببة بتاعة القانون ده
يالا هى جات على دي مهو عمالين يجربوا فينا حاجات عجيبة والله.. صحيح الشعب المصري ده له الجنة من اللي بيشوفوا من حكومتنا الرشيدة... مش رشيدة بتاعة بكار
سؤال اخير.. في ظل طريقة تفكير حكومتنا الرشيدة (بتاعة بكار المرة دي بقي) في حلول ابداعية بالطريقة دي.. تتصوروا ازاي هتحل السؤال ده
س: متى سيكون عملهم وهمهم وولائهم للشعب المصري والاسرة المصرية وليس للرئيس المصري والأسرة المالكة المصرية؟
ممكن اجاوب.. ج: في المشمش



Sunday, March 21, 2010

راجعين يا هوى




غريب هو احساس الرجوع الي شيء اعتدت التعامل معه كمدونتي العزيزة

شعرت بالحنين الي المكان الذي كنت اسكب فيه افكاري (الى حد ما) بعد فترة غياب وفتور

لا يسألني أحد لماذا ابتعدت عن التدوين لأني لا اعرف الإجابة

لن أقول مشاغل الحياة لأننا جميعا مشغولون دائما

ولكن تأتي اللحظة التي نتمنى فيها استرجاع رائحة الزهور في الايام الخوالي

احتجت الى الحنين الي الماضي

وبما انك يا مدونتي جزء من ماضي... حتى ولو كان قريب

فانني اعتذر لكِ واعود

نادما ومشتاقا

Friday, January 02, 2009

أغنية عيد الميلاد


العالم كله سعيد
بالعام الجديد
وأصوات من بعيد
بتغني وبتقول
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

وأقوى الاحتفالات
لأيام وساعات
من غزة تخرج آهات
والعالم يرد ويقول
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

بينور سماها انفجارات
طيران يضرب صواريخ
ونيران وانهيارات
والجو يتشبع صريخ
والعالم يهني ويقول
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

من شهور تحت الحصار
وينتهي بالدمار
ولا دوا ولا أكل
عيشة كلها أضرار
وحكام العرب واقفين
يتفرجوا ويتكلموا
ويسقفوا وفرحانين
ويقولوا لبعضهم
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

يا ناس يا سايبة القضية
دي مش ألعاب نارية
دي لها ألف ضحية
وميت جريح على سرير
فين العلاج والمساعدات
بدل ما تهتفوا في الاجتماعات
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

يا شباب يا مغيبين
مبسوطين وإحنا ضايعين؟
أغانى وماتشات
هي كل حياتكم
وناس من غير أمان تموت
ما تنزل علشانها دموعكم
روحوا واحتفلوا
في النوادى والديسكوهات
واصرخوا وغنوا بأعلى صوتكم
وقولوا من قلبكم
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

وشباب غضبان بيغلي
نفسه يعمل أي حاجة
مش بأيده غير انه يصرخ
في مظاهرات وإضرابات
نتيجتها إعتقالات
وضرب وإهانات
حتى صوتنا جوانا
عايزينه يخرس زي البعير
عايزين ضميرنا يموت
والأمن في كل حته
يضرب ويقول
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

يا أهل غزة المناضلين
بنعلنها مجاهرين
إحنا معاكم بقلوبنا
بدعائنا وإبتهالاتنا
ولو نستطيع
بأموالنا وأنفسنا
اصبروا واثبتوا واحتسبوا
ونأسف أننا مش هنقدر نقولكم السنة دي
وبكل حزن مرير
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

Wednesday, December 17, 2008

ع السريع


ليا 3 تعليقات مختصرة عايز اقولهم من غير كلام كتير

اولا بالنسبة لموضوع الجزمة الذهبية بتاعة منتظر اللى ارتفع سعرها من عشرة خمستاشر دولار إلى عشرة مليون دولار

دي اصلا مضربتش المدعوق على عين اهله بوش الكلب امال لو كانت جات فيه كان هيبقي سعرها كام

بس اعتقد انها لما جات في العلم أدت الغرض واكتر بكتير كمان

مش هعيد وازيد في الموضوع ده الكلام اللى اتقال عليه كتير اوي

بس مش هقول الا ان كل ظااااااالم وله يوم

ولما رئيس اكبر دولة في العالم بنضرب بالجزمة

ويستحقها فعلا لظلمة وبلطجته

يبقي لسه فيه امل ناس تانية تاخد على دماغها

وناس كتير ان شاء الله هتاخد حقها من اللى يستحق ينضرب على دماغة بالجزمة

وان شاء الله مش بجزمة انما بشبشب بخمسة جنيه وربع من على رصيف العتبة


----------


ثانيا بالنسبة للحكم اللى صدر ضد 22 متهم في احداث اضراب 6 ابريل في المحلة

تفتكرو الناس دي تستحق كده

ولا متستحقش

انا مش عايز اقول راي شخصي لانى مكونتش راي حوالين المتهمين دول

ناس تقول دول بلطجية استغلو الاضراب علشان يسرقو وينهبو على كيفهم وانهم اصلا مسجلين خطر

وناس تقول اتقبض عليهم ظلم وفيه متهمين منهم ملهمش دعوه اصلا لا باضراب ولا حاجة واتقبض عليهم عشوائي

والصراحة عن نفسي انا محتار بين الرأيين ومش قادر اكون وجهة نظر محددة

لكن كل اللى بتمناه ان يكون الحكم عادل

ومش متحامل على حد ولا مجامل لحد

واكيد انتو فاهمين يعنى


------------------


ثالثا بطلب منكم قراءة الفاتحة والدعاء لشهداء حادثة اتوبيس الموت اللى غرق في ترعة الابراهيمية

والدعاء على اللى كان السبب من اول اكبر راس الجانى الحقيقي الغير مباشر لغاية الجانى الحقيقي المباشر

وربنا يرحمهم ويصبر اهاليهم

ويرحمنا احنا كمان


Saturday, December 06, 2008

كل سنة وانتم طيبين

كل سنه وانتم بخير وصحة وسعادة وبركة
كل سنة وانتم فاهمين وعارفين وشايفين وحاسين
كل سنة وانتم متقدمين
كل سنة وانتم مدونين
وعيد اضحى سعيد عليكم اجمعين
وياريت واحنا بناكل لحمة مننساش ان فيه ناس مش بتشم ريحتها
واحنا بنفطر فته فيه ناس بتفطر فول
واحنا لابسين الهدوم الجديدة فيه ناس بردانة من قلة الهدوم
وان شاء الله العيد الجاي نبقي احسن
وكل سنة وانتم طيبين

Sunday, November 23, 2008

لحظة تأمل



نحتاجها كثيرا

وان لم نجدها فلابد ان نوجدها

لحظة تأمل مطلوبة

في كل الاحيان

كشف حساب لانفسنا وضمائرنا

وقفة تعبوية ضرورية لمتابعة مسيرة حياتنا

في هذه الدنيا القاسية التى لا ترحم من يدير لها ظهره

عبادة من اسمى وارقي العبادات

في كل الاديان السماوية وغير السماوية

ليست عبادة فقط

ولكنها ضرورة حياتية

عادة يجب ان نفهمها ونمارسها

لتساعدنا على مشاق الحياة

لنغسل روحنا من همومها

وانفسنا من رزائلها

نتدبر احوالنا

واحوال اسرنا

واهلنا

وحينا

وبلدنا

وامتنا

وقبل كل ذلك

انفسنا

Wednesday, September 10, 2008

البقاء لله.. رحمك الله يا امي

توفيت والدتى قبيل شهر رمضان المبارك..
كل ما ارجوه منكم هو الدعاء لها بالرحمة والمغفرة..
رحمها الله وغفر ذنوبها وادخلها فسيح جناته.. آمين
الفاتحة أمانه..

Monday, February 25, 2008

كلام وسط الزحام


كان الكلام وسط الزحام
أيه الكلام... متفهموش

فيه ناس تهلفط وناس تبلبط
وناس كلامها يطلع فاشوش

كان الزحام عند الميدان
وشوش كتير شايله نعوش

قال إيه إعتصام من غير كلام
قال إيه مظاهرة... وميهتفوش

وأنا كنت ماشي ولقيتني فجأة
بين المعارك... وسط الجيوش

عسكر كتير ملهاش مثيل
واللبس ميري يداري الكروش

والحرب قامت وبلادي نامت
وكل الشطارة حفظ العروش

وأخدلي ضربة وعلى راسي خبطة
وكل ده... وميكفهوش

وطلعت أجري ولقيتلي رجلي
تدوس ع ناس... ميهمنوش

وأنا بس مالي وأعمل إيه
أنا همي أهرب من الوحوش

وروحت بيتي ودمي سايح
جروح كتير دي ولا خدوش

وقلبي يبكي ع اللي بيحصل
وعنيا تسهر... ولا يناموش

وفُت تاني على الميدان
وشفت من تاني الزحام
من غير سلام ولا كلام

لقيتني واقف مع الوشوش
وشايل مع الناس النعوش
واللي حصل أنا منساهوش