أغنية عيد الميلاد

العالم كله سعيد
بالعام الجديد
وأصوات من بعيد
بتغني وبتقول
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

وأقوى الاحتفالات
لأيام وساعات
من غزة تخرج آهات
والعالم يرد ويقول
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

بينور سماها انفجارات
طيران يضرب صواريخ
ونيران وانهيارات
والجو يتشبع صريخ
والعالم يهني ويقول
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

من شهور تحت الحصار
وينتهي بالدمار
ولا دوا ولا أكل
عيشة كلها أضرار
وحكام العرب واقفين
يتفرجوا ويتكلموا
ويسقفوا وفرحانين
ويقولوا لبعضهم
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

يا ناس يا سايبة القضية
دي مش ألعاب نارية
دي لها ألف ضحية
وميت جريح على سرير
فين العلاج والمساعدات
بدل ما تهتفوا في الاجتماعات
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

يا شباب يا مغيبين
مبسوطين وإحنا ضايعين؟
أغانى وماتشات
هي كل حياتكم
وناس من غير أمان تموت
ما تنزل علشانها دموعكم
روحوا واحتفلوا
في النوادى والديسكوهات
واصرخوا وغنوا بأعلى صوتكم
وقولوا من قلبكم
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

وشباب غضبان بيغلي
نفسه يعمل أي حاجة
مش بأيده غير انه يصرخ
في مظاهرات وإضرابات
نتيجتها إعتقالات
وضرب وإهانات
حتى صوتنا جوانا
عايزينه يخرس زي البعير
عايزين ضميرنا يموت
والأمن في كل حته
يضرب ويقول
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

يا أهل غزة المناضلين
بنعلنها مجاهرين
إحنا معاكم بقلوبنا
بدعائنا وإبتهالاتنا
ولو نستطيع
بأموالنا وأنفسنا
اصبروا واثبتوا واحتسبوا
ونأسف أننا مش هنقدر نقولكم السنة دي
وبكل حزن مرير
وي ويش يو أميري كريسماس,
وي ويش يو أميري كريسماس,
وي ويش يو أميري كريسماس,
أند أهابي نيو يير.

ع السريع

ليا 3 تعليقات مختصرة عايز اقولهم من غير كلام كتير

اولا بالنسبة لموضوع الجزمة الذهبية بتاعة منتظر اللى ارتفع سعرها من عشرة خمستاشر دولار إلى عشرة مليون دولار

دي اصلا مضربتش المدعوق على عين اهله بوش الكلب امال لو كانت جات فيه كان هيبقي سعرها كام

بس اعتقد انها لما جات في العلم أدت الغرض واكتر بكتير كمان

مش هعيد وازيد في الموضوع ده الكلام اللى اتقال عليه كتير اوي

بس مش هقول الا ان كل ظااااااالم وله يوم

ولما رئيس اكبر دولة في العالم بنضرب بالجزمة

ويستحقها فعلا لظلمة وبلطجته

يبقي لسه فيه امل ناس تانية تاخد على دماغها

وناس كتير ان شاء الله هتاخد حقها من اللى يستحق ينضرب على دماغة بالجزمة

وان شاء الله مش بجزمة انما بشبشب بخمسة جنيه وربع من على رصيف العتبة

----------

ثانيا بالنسبة للحكم اللى صدر ضد 22 متهم في احداث اضراب 6 ابريل في المحلة

تفتكرو الناس دي تستحق كده

ولا متستحقش

انا مش عايز اقول راي شخصي لانى مكونتش راي حوالين المتهمين دول

ناس تقول دول بلطجية استغلو الاضراب علشان يسرقو وينهبو على كيفهم وانهم اصلا مسجلين خطر

وناس تقول اتقبض عليهم ظلم وفيه متهمين منهم ملهمش دعوه اصلا لا باضراب ولا حاجة واتقبض عليهم عشوائي

والصراحة عن نفسي انا محتار بين الرأيين ومش قادر اكون وجهة نظر محددة

لكن كل اللى بتمناه ان يكون الحكم عادل

ومش متحامل على حد ولا مجامل لحد

واكيد انتو فاهمين يعنى

------------------

ثالثا بطلب منكم قراءة الفاتحة والدعاء لشهداء حادثة اتوبيس الموت اللى غرق في ترعة الابراهيمية

والدعاء على اللى كان السبب من اول اكبر راس الجانى الحقيقي الغير مباشر لغاية الجانى الحقيقي المباشر

وربنا يرحمهم ويصبر اهاليهم

ويرحمنا احنا كمان

كل سنة وانتم طيبين

كل سنه وانتم بخير وصحة وسعادة وبركة

كل سنة وانتم فاهمين وعارفين وشايفين وحاسين

كل سنة وانتم متقدمين

كل سنة وانتم مدونين

وعيد اضحى سعيد عليكم اجمعين

وياريت واحنا بناكل لحمة مننساش ان فيه ناس مش بتشم ريحتها

واحنا بنفطر فته فيه ناس بتفطر فول

واحنا لابسين الهدوم الجديدة فيه ناس بردانة من قلة الهدوم

وان شاء الله العيد الجاي نبقي احسن

وكل سنة وانتم طيبين

لحظة تأمل

نحتاجها كثيرا

وان لم نجدها فلابد ان نوجدها

لحظة تأمل مطلوبة

في كل الاحيان

كشف حساب لانفسنا وضمائرنا

وقفة تعبوية ضرورية لمتابعة مسيرة حياتنا

في هذه الدنيا القاسية التى لا ترحم من يدير لها ظهره

عبادة من اسمى وارقي العبادات

في كل الاديان السماوية وغير السماوية

ليست عبادة فقط

ولكنها ضرورة حياتية

عادة يجب ان نفهمها ونمارسها

لتساعدنا على مشاق الحياة

لنغسل روحنا من همومها

وانفسنا من رزائلها

نتدبر احوالنا

واحوال اسرنا

واهلنا

وحينا

وبلدنا

وامتنا

وقبل كل ذلك

انفسنا

البقاء لله.. رحمك الله يا امي

توفيت والدتى قبيل شهر رمضان المبارك..

كل ما ارجوه منكم هو الدعاء لها بالرحمة والمغفرة..

رحمها الله وغفر ذنوبها وادخلها فسيح جناته.. آمين

الفاتحة أمانه..

كلام وسط الزحام

كان الكلام وسط الزحام
أيه الكلام... متفهموش

فيه ناس تهلفط وناس تبلبط
وناس كلامها يطلع فاشوش

كان الزحام عند الميدان
وشوش كتير شايله نعوش

قال إيه إعتصام من غير كلام
قال إيه مظاهرة... وميهتفوش

وأنا كنت ماشي ولقيتني فجأة
بين المعارك... وسط الجيوش

عسكر كتير ملهاش مثيل
واللبس ميري يداري الكروش

والحرب قامت وبلادي نامت
وكل الشطارة حفظ العروش

وأخدلي ضربة وعلى راسي خبطة
وكل ده... وميكفهوش

وطلعت أجري ولقيتلي رجلي
تدوس ع ناس... ميهمنوش

وأنا بس مالي وأعمل إيه
أنا همي أهرب من الوحوش

وروحت بيتي ودمي سايح
جروح كتير دي ولا خدوش

وقلبي يبكي ع اللي بيحصل
وعنيا تسهر... ولا يناموش

وفُت تاني على الميدان
وشفت من تاني الزحام
من غير سلام ولا كلام

لقيتني واقف مع الوشوش
وشايل مع الناس النعوش

واللي حصل أنا منساهوش

كلم نفسك

اليومين دول بلاحظ حاجة غريبة بتحصل كتير وبدأت تنتشر بصورة متزايدة واكيد اي حد فيكم شاف الحالات دي
ناس بتكلم نفسها!!
انا مقصدش الناس اللي بتبقي باين عليها هربانه من مستشفى الامراض العقلية وماشيين بهدوم مقطعة وكل شغلها في الحياة انها تمسك صفارة وتنظم المرور إنما ناس عادية زيي وزيك كده
تلاقيهم في الشارع أو في الاتوبيسات أو في أي حتة
انا شخصيا شفت الموضوع ده كذا مرة على فترات متقاربة
يعني مثلا آخر مرة كانت امبارح وأنا ماشي مع واحد صاحبي وكان فيه راجل ماشي في نص الشارع عمال يكلم نفسه وسرحان
وجات من وراه عربية نقل كبيرة وقفت ومش عارفة تعدي منه وهاتك يا كلكسات وبيب بيب يا عم أوعى يا عم حاسب وهو في دنيا تانية خالص
ومخدش باله إلا لما واحد شده من دراعه وخده على الرصيف
المفاجأة بقي اننا كنا فاكرين ان الراجل ده مخه تعبان أو مجنون أو عنده لطف - وما أكثرهم في عهد رئيسنا المحبوب وكمان دول في ازدياد مستمر- يا لطيف يا لطيف
لكن اتضح بعد ما كلمته انا وصاحبي واتنين كمان اهتمو بالموضوع أنه شخص عادي جدا عنده خمسه وخمسين سنة وبيشتغل موظف في وزارة الاوقاف وبعد الضهر بيشتغل في مخزن خشب وكل الحكاية انه كان ماشي سرحان وبيكلم نفسه
انا قولتله معقولة سرحان لدرجة انك متسمعش صوت كلاكس العربية النقل اللي يصحى شارع بحاله
وفجأة لقيناه بيعيط
قولناله ايه يا عم بس مالك فيه ايه وحد الله كده واهدى
الراجل كأنه ماسورة وانفجرت وعينك –قصدي ودنك- ما تشوف إلا النور
قعد يحكيلنا قصة حياته كلها كأنه ما صدق
عنده 3 ولاد واحد في ثانوي واتنين في الجامعة ومش قادر يدفعلهم مصاريف الكلية لغاية دلوقت
واللي في ثانوي بياخد دروس في كل المواد في مجموعات التقوية في الجامع لأنه مش قادر يوديه دروس خصوصية
وكان جايب غسالة بالتقسيط مش قادر يسدد اقساطها ومشاكل كتير كده وكل مشكلة اكبر من التانية
يا نهار اسود على الناس واللي بيحصلها يا جدعان
أنا الصراحة سمعت كلامة حسيت بجد أن الدنيا اسودت في وشي والراجل صعب عليا بجد
فعلا اللي يشوف بلاوي الناس تهون عليه بلوته
طيب ده راجل موظف محترم وبيشتغل شغلتين وكل ده مش قادر يصرف على ولاده ولا يسدد قسط الغسالة ولا يقدر يجيبلهم لحمة إلا تلت أربع مرات في السنة...آه والله وبيحصلة كل ده
امال احنا يا شباب لسه متخرج ومش لاقي شغل والدنيا ملطشة معانا نعمل ايه ونتجوز أزاي ونواجه الحياه بأي وش واحنا بنشوف النماذج دي
أنا بعد ما روحت البيت قعدت أفكر في الراجل ده وليه هو حالته كده ... يا ترى هو قصر في حاجة؟
يا ترى لو كان بياخد رشاوي زي ما موظفين كتير بيعملوا كانت حالته المادية هتبقي أحسن؟
طيب هو يقدر يعمل أيه عشان يقدر يصرف على ولاده كويس ويدفعلهم مصاريف الجامعة ويسدد قسط الغسالة؟
يروح يسرق يعني ولا ياخد رشاوي ولا يمشي مشي بطال ويشتغل رقاصة على رأي عادل إمام
يا تري أنا يا شاب لسه في مقتبل حياتى لما أشوف كده هيكون أحساسي أيه؟
ايه اللي هيخليني اتعب نفسي وأشتغل وأتجوز وفي الآخر اجيب عيال مقدرش أصرف عليهم في الظروف المهببة دي؟
يا تري الحكومة ليها دور في اللي بيحصل ده؟
ولو كانت المرتبات كويسة والاسعار مش غالية والتعليم مجانى فعلا زي ما بيقولو هيكون حال الراجل ده وملايين مطحونين زيه كده بالمنظر ده؟
يالا انا عارف ان الاسئلة دي من غير إجابات وحتى لو لقينا إجابات فهي لا هتقدم ولا هتأخر
المهم
قبل كده برده حصل موقف مشابهه تقريبا بعد عيد الأضحى بأسبوع تقريبا
كنت راكب الاتوبيس وكان قاعد ادامي واحد نفس الحالة اللي فاتت وإن كان أصغر شوية يعني ميعديش الاربعين سنة
وشغال مع نفسه مناقشات ومفاوضات ومؤتمرات وخناقات وبرده شكله مش مدي على مجنون ولا حاجة
الغريبة في الموضوع أن الناس كانت بتبصله عادي خالص كأن دي حاجة طبيعية يعني ومتعودين عليها وكأن الناس اللي بتكلم نفسها فئة من فئات المجتمع المصري زي العمال والفلاحين والفئات
سألت اللي كان قاعد جنبى قولتله الراجل ده لابس كويس وشكله ابن ناس ورغم ذلك عمال يكلم نفسه كأنه مجنون ولا حاجة
قالي يا عم سيبك هو تلاقيه بس بيفكر هيأكل عيالة منين بس بصوت عالي شوية وبعدين الناس كلها بقت كده يعني والحياة بقت صعبة وكل سنة وأنت طيب
قولتل وانت طيب ورحت ساكت
أنا مش قادر أكمل يا جماعة البوست ده
بجد اتخنقت... كفاية كده

رسائل قصيرة

السلام عليكم
عدنا والعود أجمد بأذن الله
طبعا عيدنا وأكلنا لحمة وكلة تمام التمام والحمد لله
أنا والله خلال فترة بعد العيد المدونة وحشتنى أوي وكنت كاتب الموضوع ده وعايز انشرة بس النت بقي وعمايلة السودة
المهم
وحشتونى كلكم ووحشتنى تعليقاتكم الجميلة
وأدى الموضوع أهو
طبعا العيد ده بيبقي موسم الاس أم أس وكله بيبعت لكله
أنا بقي كتيت كام رسالة كده لناس عايز أقولهم حاجة

حسنى مبارك : أنا مش عارف هقولك أيه ولا أيه انا جوايا كلام يملى كتب, مش هقول غير منك لله.

جمال مبارك : وحياة ماما سوزان ما انت شايفها, وأن شوفتها مش هتتهنى بيها.

أحمد نظيف : خليك عايم على عومهم بكرة كله يطلع على جتتك.

السفاح اسلام نبيه : أحسن تستاهل, والله 3 سنين شوية عليك, ربنا ياخدك انت وكل الظباط اللي زيك.

محافظ البحيرة : هو أنت اللي قولت ان اليهود مش هيعملو المولد بتاع أبو حصيرة في دمتيوه؟ أهم عملوه زي كل سنة. وسؤال بريء منى , أنت عبيط ولا شكلك كده؟

أحمد عز : لم فلوس ونفوذ يا عم براحتك, ربنا مبيسيبش, ومبروك الجواز,عقبالي يااااااااااارب ))):

ممدوح إسماعيل : هتروح من ضميرك فين -ده لو عندك واحد- وهتروح من ربنا فين.

وزيرة القوى العاملة المصرية : جتك نيلة عليكي وعلى اللي مشغلك. ربنا يرخصك انتى وبناتك زي ما رخصتى بنات مصر قادر يا كريم.

د/ أحمد زويل : أنت ايه بس اللي جابك مصر, ما انت كنت عالم محترم هناك في أمريكا ,ولما جيت مصر هيعملوك موظف وكل سنة وانت طيب, نصيحتي قضيها زيارات وخلاص بلا مشاريع بلا بتاع البلد دي مش بتاعة مشاريع, المشروع الوحيد اللي نجح هو مشروع الأسرة المنتجة والدليل أن مصر بتنتج راقصة كل دقيقة.

بنازير بوتو : ربنا يرحمك, ادى اخرة اللي يطالب بالديموقراطية في بلد مفيهاش ديموقراطية, وانا بحترمك وبترحم عليكي مع انى مش موافق على بعض آرائك, لكن كفاية انك كنتى واقفة قدام ظاغية, ست بميت راجل.

مفتي مصر : يا عم مش كده أرحمنا, أيه اللي انت بتطلع تقولو كل شوية ده, أركز شوية يا حاج على الله يكرمك, اركزززززز.

شيخ الأزهر : أنت كل يوم بتثبت أنك متستحقش المنصب ده.

إبراهيم عيسى : ربنا معاك انت وكل اللي زيك.

أهالي جزيرة القرصاية : ربنا معاكو.

مدونتى : وحشتيني.

أهلى وأصحابي وحبايبى وزوار مدونتى : كل سنة وانتو طيبين وسنة سعيدة عليكو بأذن الله, أنا عارف أن ده كلام ملوش معنى وبنردده على طول وأننا طول ما أحنا عايشين في الهم ده وأبو خشم –على رأي جدتى- فوق راسنا مش هتكون سنة سعيدة ولا حاجة, لكنها البروتوكولات اللعينة هنعمل أيه بقي. لكن فعلا أتمنى أن السنة الجديدة سواء الهجرية أو الميلادية تكون أحسن على الأقل على المستوى الشخصي, وأن شاء الله كل واحد يحقق أحلامه وكل اللي بيتمناه المهم مننساش ربنا أبدا ولا تعاليم نبيه عليه الصلاة والسلام ونتوكل على الله ونصلح من نفسنا واحنا أن شاء الله هنكون أحسن.

حبيبتي : أنا مستنيكي, مع أنى لسه مقابلتكيش ولا عرفتك لكن مستنيكي, وبحبك أوي, من قبل ما أشوفك, بحبك.

تصبحو على خير بقي لحسن الشحن قرب يخلص

كل عام وانتم بخييييييييير

كل سنة وانتو طيبين جميعا وان شاء الله يكون عيد سعيد عليكم
والعيد الجاي باذن الله يكون من غير فرعون (على راي كفاية)
ايه ده هو انا هقلبها سياسة حتى في العيد
الواحد عايز يلم لسانه شويه مش عارف
ان شاء الله في العيد ناوى اخد هدنة تدوينية سياسية نكدية شاملة
يعنى في العيد لا للسياسة ولا للنكد ولا للتدوين ولا لمبارك
يوه يادى النلية مش قولنا بلاش سياسة يا عم انت
خلاص خلاص على العموم احنا لسه النهارده الوقفة ولسه العيد بكرة
يبقى حظر التجول يووووه قصدي حظر السياسة من اول بكرة ان شاء الله ولمده اربع ايام العيد في جميع دور العرض

يالا بقي اشوفكو ان شاء الله كمان اسبوع ومتأسف جدا ليكم لو كنت مقلل شوية اليومين دول لكن كنت مشغول جدا والله
وكل سنة وانتو طيبين

الا بالمناسبة هو كيلو اللحمة بقي بكام النهاردة؟

ليه يا وطن؟؟!!

مصر...انا بحبك
وزعلان عشانك أوي
زعلان من اللي بيحصل فيكي
من اللى ولاد الكلب بيعملوه ومش لاقيين حد يحاسبهم
هى دي أخرتها
معقولة الأمور توصل للدرجة دى
الشرطة وقولنا ماشي
ودخلنا في موواويل وحوارات وافشخنات ملهاش أول من اخر
لكن توصل للجيش
بجد أنا مش مصدق
ومذبهل لغاية دلوقت
عمري ما تصورت أن الأمور توصل للدرجه دى
رجاء..اتفرجوا على الفيديو لغاية الآخر...
وبعد كده اعملوا اللي انتو عايزينه...
حسوا اللي انتو عايزينه...
قولو اللى انتو عايزينه...

----------------------

لو الفيديو يا جماعة مظهرش ده الرابط بتاعة على الحاج يوتيوب

http://www.youtube.com/watch?v=38EXk57sJ6w

يا مهنينا

دار هذا الحوار بينى وبين احد اصدقائي على النت بعد ان دخل المدونة وشاف المواضيع الي فيها.

انا: ايه رأيك في الكلام اللى مكتوب ده
هو: ينهار اسود اية اللى انت باعتة دة دة انت لو بعت نسوان يبقى احسن بلاش كلام فى السياسة الله يكرمك
انا: هههههههههه لا بجد ايه رأيك
هو: والراجل عيعمل اية نسوان ونسونجة حشيش وحششنا يعملكم اية يا علوج
انا: لا الصراحة يعنى الراجل يشكر وزيادة بس يعنى الكلام مش عاجبك ؟
هو: اه
انا: يعنى هو مش عاجبك عشان كلام في السياسة عموما ولا انا بتكلم اصلا غلط وبقول حاجات محصلتش؟
هو: مش عارف انت قلبت مخبر ولا ايه
انا: يا عم مخبر ايه بس خلاص روح جتك نيلة وانت مش عارف حاجة
هو: يا عم كفاية بنات الكلية ربنا يقوينا عليهم كمان هنتكلم في السياسة
انا: على رأيك انت هتلاقيها منين ولا منين ربنا يعينك والله

انا مش هعلق على الكلام هسيبكو انتو تعلقو بس فيه كلمة صغيرة واقفة في زوري وعايزة تطلع
سيدي الرئيس, شكرا على البنات اللي ماشيين في الشارع ولابسين من غير هدوم ........ شكرا على الحشيش والبانجو والذي منه اللى مدلعنا بيهم آخر دلع........... شكرا على القنوات الفضائية اللى مهنى بيهم شباب مصر.....شكرا على حاجات كتير اوى... يا مهنينا

العيسوى بيه...والحدق يفهم

استمتعو على انغام اسكندريلا وكلمات احمد فؤاد نجم

هل يا تري مازالت مصر هي امي؟!!

طبعا انتو اكيد سمعتو قبل كده الاغنيه اللي بتقول مصر هي مامتى...خضرا لون بيجامتى
لكن يا تري انتو حاسينها...حاسين فعلا ان مصر مامتنا..حاسين بانتماء ليها؟
لو بصينا دلوقت للوضع الراهن في مصر بس متبصوش كتير عشان عنيكم متوجعكوش
هنلاقيها مش هي مصر بتاعة زمان..هتلاقو ان اسمها تحول من مصر المحروسة اللي مصر المنحوسة
بلاوي وكوارث وحوادث
حبس وتعذيب
تأخر في جميع المجالات
ديكتاتورية وغياب فظيع للديموقراطية وتحكم الامن في كل شبر في البلد
كرامة المصريين متهانه في الداخل والخارج ومتسواش اكتر من تلت اربع تلاف ملطوش في احسن الاحوال كتعويض عن حرقهم او غرقهم او دهسهم
فشل في كل شيء واي شيء
ونجاح باهر في الاغانى وفيديو كليبات العري
لغاية ما الناس بتوع دول الخليج افتكرو ان مصر دي وكر استغفر الله العظيم يعني مش قادر انطقها دعارة وكده
والاعلانات اللي تغيظ اللي تقولك نورتو مصر ونيلتو مصر واكيد انتو عارفينها وعارفين منظر البنات اللي بيطلعو فيها
صحة مفيش وامراض منتشرة في معظم جسد المصريين ونظام تأمين صحي زي الزفت وبالتالي انتاج مفيش
نظام تعليم فاشل وبيطلع اجيال من معدومى الابتكار والتفكير
البلد بتتباع..واللي عبد الناصر اممه وفاد بيه البلد هما جايين يبيعوه دلوقت
مع ان القطاع العام هوه اللي موقف البلد على رجليها لغاية دلوقت
يا تري هي دي مصر
هل تقبلو ان دى تبقي امكم
تقبلو انها تبقي بالشكل ده
انا صحيح بحب مصر..لانها بلدى ..ولانها تستحق انها تتحب
لكن معقولة مصر تستحق مننا كل ده
انا اعلنها صراحة...بحبك يا مصر...وبكرهك يا حكومة مصر

اعلنها صراحة...مصر مش هي امى...مصر بقت مرات ابويا

البقاء لله.....

إنا لله وإنا إليه راجعون
ربنا يرحمك يا شيماء انتى وداليا ويغفر لكم ذنوبكم باذن الله
يا رب يجعل مثواكم الجنه ويرزقكم رؤية وجهه الكريم
ويصبر اهلكم والناس اللي بتحبكم باذن الله
يا جماعة اللي ميعرفش شيماء وداليا
شيماء كانت صاحبة مدونة شيكو أون لاين
وكان اخر بوست ليها يوم 4 يوليو 2007
وداليا كانت صاحبة مدونة واحدة بتشوف الدنيا من البيت
واخر بوست ليها كان يوم 4 اغسطس 2007
معلوماتى عنهم قليلة جدا
ومكنتش اعرفهم خالص
كل اللي اعرفه عنهم انهم كانو مدونين انتقلو الى رحاب الله مؤخرا
وعرفت الموضوع من المدونات التانية
ورغم انى معرفهمش لكن اتأثرت بوفاتهم جدا
احساس غريب تقشعر له الابدان لما تدخل مدونة حد وتقرا مواضيعه وانت عارف انه انتقل الى رحمة الله
حاجة مؤثرة بجد
امانه يا جماعة كل اللي يشوف البوست ده يقرالهم الفاتحة ليهم وكل اموات المسلمين....ويدعيلهم....امانه

ماذا لو سقط بنطلون جمال مبارك في يوم فرحه؟!

وانا قاعد كده في لحظة صفا مع نفسي بعد ما شربتلي كانزايه حلوه كده وانا بسمع فيروز ومخمخت ...وانتو طبعا متعرفوش انا بيبقي عامل ازاي بعد الكانز وفيروز مع بعض......جالي خاطر كده عن حاجة معرفش بابا حسحس فكر فيها ولا لا.
بغض النظر عن الكلام الكتير اللي اتقال عن موضوع توريث الحكم لجمال سواء في الصحف او المدونات او التليفزيون...احنا كلنا عارفين الكلام ده
لكن يا ترى حسحس فكر ان فيه حاجة هو ناسيها خالص اسمها الموت؟!!!!!
هيحصل ايه لو حسنى مات دلوقت اليومين دول؟(ربنا قادر على كل شيء ادعو معايا يا جماعة والنبي)
انا مش هتكلم عن مصر ولا الشعب ولا حاجة من دى وهيكون ايه الوضع ساعتها لأن فعلا الموضوع كبير...لكن هتكلم عن جمال ذات نفسه.
نفرض مثلا اننا لسه سامعين حالا خبر وفاة حسنى في الجزيرة (وش واحد رافع ايدة للسما وبيقول يا رب)
والحكاية دي حصلت قبل ما ننوس عين امه جيمي يمسك الحكم زي ما ابوه مخطط
يا تري جيمي افندى كعب الغزال هيعمل ايه وهيكون ايه موقفه وهو من غير ضهر يحميه؟
على فكرة جمال ليه اعداء كتير ودي حاجة معروفة طبعا.......لكن انا مبتكلمش على معارضة ولا اخوان ولا غيرة انما بتكلم على ناس جوه الحزب الوطنى
تقريبا كل مجموعة الحرس القديم ضد جمال ده طبعا غير المعارضة واي حد ملوش مصلحة معاه هيكرفة على طول
لأن جمال من غير ابوه ميسواش حاجة
وفعلا هيبقي جمال عامل بالظبط زي اللي بنطلونه وقع منه يوم فرحه...تصورو هيبقي منظرة عامل ازاي واحساسه هو عامل ازاي؟!
يا تري جمال دلوقت اصبح بالقوة في الحزب بحيث ان وفاة ابوه متأثرش معاه؟...............متهيألي لا ......معتقدش .
وبعدين لو شله جمال لقت ان مصلحتها بعد وفاه حسنى مش معاه اكيد هيسيبوه ويشوفو مصلحتهم مع غيرة.
لأن دلوقت جمال مكتسب اهميته من منصب ابوه بس ولو ابوه مات هيفقد كتير اوي من قوته ومكانتة السياسية
وبعدين برده امريكا ليها دور في توريث جمال الحكم لأنها بمنتهى البساطة عايزة اللي يمسك بعد مبارك يكون اي حد غير الاخوان غير كده مين اللي يمسك مش مهم.. المهم يكون علمانى وعلى هواها زي مبارك .
واحتمال برده بعد موت مبارك امريكا تصرف نظر عن جمال وممكن تلاقي مصلحتها مع حد تاني
اولا واخيرا كلها احتمالات ممكن تكون صح او غلط
ما انا قولتلكم ان الكانز مع صوت فيروز بيعملو دماغ بوابين انما ايه...........
بقولكو ايه سيبكو من كل ده
دي كانت مجرد هلوسة مع نفسي
المهم دلوقت
تعالو ادعو معايا احسن
ياااااااااااااااااارب
انت القادر على كل شيء
وانت القادر تنقذنا من اللي احنا فيه ده
يارب جمال بنطلونه يقع يوم فرحه
يااااااااااااارب

حالة تجلي عشقية....

اكتشفت مؤخرا ان الحب ده وحش اوي....سهر واشتياق وتفكير كتير وحاجات كتير كده متتكتبش...انما تتحس

وجع قلب فعلا...انما وجع قلب لذيذ

زمان مكنتش متصور نفسي انى احب خالص وابقي زي نجوم الافلام العربي القديمة كده

وكنت مقرر اني محبش عشان اتجنب اللي كان بيحصل لبتوع الافلام دول

لكنى كنت عبيط...لأنى اكتشفت ان الحب مفيهوش قررت او مقررتش وناوي تحب ولا مش ناوي

دي حاجة بتيجي كده فجأه متعرفش هتيجي امتى ولا مع مين

حاجة متتفهمش بالعقل ...انما تتحس بالقلب

والغريبة فعلا ان الواحد ساعات بيتعذب من الحب ده ولكن مستمتع بعذابه ده

لأن احلى ما في الحب عذابه..الواحد مننا لو متعذبش وحس انه مفتقد حبيبته ونفسه تكون جمبه في اللحظة دي..يبقي محبش

والاغرب من كل ده ان الواحد ممكن يحب حد ويكون لسه مقابلوش ولا سمع صوته....ممكن تحصل؟!.......اكيد ممكن.

وافتكر دلوقت عمنا صلاح جاهين وهو بيقول:

ولما زماني رماني عليل

نسيت كل شيء عن حبيبي الجميل

لكن هو أبداً

انا مانساهوش

نسيت مشيته وصوته كان شكله إيه

ورسمة شفايفه

ولمسة إيديه

نسيت نظراته

نسيت لون عينيه

وقوس الحواجب وسهم الرموش

لكن هو أبداً

انا ما انساهوش

نسيت إسمه وحكايته وعرفته فين

وعشنا سوى العمر

والا يومين

وكان م البشر

والا طير بجناحين

نسيت حتى كان له وجود أو مالوش

لكين هو أبداً

أنا ما انساهوش

لا للتوريث ...عارفين يعني ايه معناها

فيه ناس كتير من الشعب المصري بتعتبر جمال مبارك هو الرئيس القادم لمصر بنسبة 100 % .
وناس تانية بتعتبر انه ممكن يكون رئيس وممكن ميكونش على حسب الظروف
وناس تالتة عارفة كل محاولات مبارك عشان يورث ابنه لكن بتحاول تعمل حاجة عشان تمنع ده
لكن في المجمل كلنا عارفين ان حسنى مبارك بيعد ابنه لوراثة الحكم على الرغم من ان نظام مصر السياسي هو الجمهوري مش الملكى وكمان عارفين ان مبارك ولا همه معارضة ولا شعب ولا اي حاجة وبيتعامل مع مصر على انها عزبتة الخاصة يتصرف فيها زي ما هو عايز .

لكن فيه حاجة هنا...ايه اللي خلاه يعمل كده؟
بكل بساطة مبارك بيطبق المثل اللي بيقول (يا فرعون ايه فرعنك قال ملقتش حد يلمنى)
فعلا هو ملقاش حد يقف قصادة...بالنسبة للمعارضة سواء اخوان او احزاب معارضة او غيرة اي مجهود ليهم بيروح على الارض لان مبارك من الاخر كده مأمن نفسة كويس..بمعنى ان الداخلية كلها تحت امرة واونكل حبيب العادلى بينفذله كل طلباته..زور حاضر يا ريس...اعتقل حاضر يا ريس..اسحل حاضر يا ريس..طلع ميتين ام الشعب حاضر يا ريس

وسيبكم من حكاية الـ 88 نائب بتوع الاخوان في المجلس لانهم زي قلتهم قدام الاغلبية بتاعة الحزب الوطنى
وسيبكم كمان من مظاهرات كفاية علشان دايما الامن مظبطها تمام

طيب والسؤال هنا..والشعب فين من كل ده؟فين عامة الناس؟
اقولكم....
الناس البسيطة ملهية في اكل عيشها.ومن اللي بيشوفوه وبيسمعو انه بيحصل في اقسام البوليس والمعتقلات بقي فيه حالة جبن عام عند الناس...كل واحد بيقولك وانا مالي يا عم انا مليش دعوة خلينا ماشيين جمب الحيط احنا عايزين نربي العيال وملناش دعوة بالسياسة .
والصراحة الداخلية لغاية دلوقت قيمة بالواجب وزيادة مع اي حد يتكلم على اساس اضرب المربوط يخاف السايب

وبعدين فيه مقومات كتير تخلى الناس تفكر بالاسلوب ده
يعني من اول التعليم الفاشل اللي بيقتل اي روح ابداع وابتكار وطريقة تفكير منظمة عند الانسان
لغاية الاعلام المصري المدهول على عينه اللى عمال طول النهار يعدد في انجازات الريس راعى الرياضة وراعي الثقافة وراعي الفن وراعي كل حاجة في مصر حتى التعذيب بقي هو اللي راعيه كمان
وعندكو كمان الصحافة الحكومية اللى بتجبلى ضغط وتحس ان البلد اللي بيتكلمو عنها اكثر تطور وثقافة وحضارة وقوة من امريكا نفسها يعني بيتكلمو على بلد من كوكب المريخ
وزي ماقولنا غير الحكايات المرعبة اللي الناس بتسمعها عن البوليس واللى بيعملة في الناس اللى بيقعو في ايدهم

كل ده خلى الناس في حالة جبن..واصبح توريث الحكم لجمال حاجة ملهمش دعوة بيها
اصلهم متعودين من زمان على ان الحكومة بتجيب اللى هي عايزاه سواء في مجلس الشعب او المجالس المحلية او حتى النقابات...فمجتش يعنى على رئيس الجمهورية
مع ان الناس عارفة ان جمال مش هيبقى احسن من ابوه في حاجة بالعكس ابوة لما مسك الحكم مكنش عندة اي خبرة سياسية لكن نقدر نقول انه بقي عندة خبرة مع الوقت..لكن جمال طول عمرة في البيزنس ومكانش ليه اي دعوة بالسياسة لغاية ما ابوة قرر انه يمسكة الحكم من بعديه..وطبعا حشره حشر في الحزب الوطنى وعمال كل شوية يرفعة من منصب لمنصب اعلى وطبعا النهاية معروفة وهيستلم مصر بيضة مقشرة!!!!!!!!
طيب والحل.........ايه الحل؟
الحل في ايد الناس..لازم يعرفو ان احنا مش شوية بهايم في زريبة وصاحبها يورثنا لابنة زي ما هو عايز
لازم الناس تعرف ان احنا في جمهورية مش مملكة يعني احنا اللي نختار اللي يحكمنا
لازم الناس تعرف بلاوي حسنى مبارك واللي بيعمله زبانيته في الناس
لازم الناس تعرف ان جمال معندوش اي خبرة وهيودى البلد في داهية
لازم الناس تعرف ان الديموقراطية هي الحل لكل اللي احنا فيه ده من فساد وبطالة وتاخر في الزراعة والصناعة وكل المجالات
لازم الناس تعرف انها لو اختارت الشخص المناسب اللي يستحق انه يحكم بلد كبير ومهم زي مصر اكيد هيكون حالنا احسن
لازم الناس تعرف انها لازم تتحرك عشان مستقبلها ومستقبل اولادها واحفادها والاجيال اللي جاية
لازم الناس تعرف الحاله اللي وصلت ليها مصر تحت حكم مبارك ولازم نفوق بقي كفايانا نوم
لازم الناس تعرف ان مصير البلد دي بايدها وهما اللي هيخلو مصر تتقدم لما يمنعو مبارك من انه يعاملنا زي ما نكون شغالين في عزبتة الخاصة ويورثنا لابنه
لازم الناس تعرف يعني ايه توريث ولازم يقولو لا للتوريث

الناس دي اللي هي انا وانت وانتى واهالينا وجيرانا واصحابنا ...محدودى الدخل او الاصح معدومى الدخل ...عامة الشعب...الناس المطحونة المظلومة
مش الناس اللى عايشة في نعيم الله اعلم مصدرة ايه ويهمها ان الوضع يبقي على ما هو عليه عشان مصلحتها مع الحكومة الحالية وفي ستين داهية البلد
افهمو بقي يا ناس...افهمو واتحركو...والا هتندمو .....

بحبك يا مصر